Аягөз ауданында медиация институтын ұйымдастыру бойынша семинар өтті

«Абай облысы ішкі саясат басқармас» ММ «Этносаралық саладағы жанжал көріністерін шешу және алдын алу бойынша ақпараттық-түсіндіру жұмыстарын және медиацияны жүргізу» әлеуметтік жобасы аясында «Сана» ЖҚБ Аягөз ауданында «Медиация институтын ұйымдастыру» тақырыбында семинар-тренинг өткізді.

Шараға ауданның медиация (этномедиация) жұмыстарына жауапты мамандар, мемлекеттік қызметкерлер, колледж өкілдері, тәрбие ісі жөніндегі директор орынбасарлары, психологтар, әлеуметтік педагогтар, заңгерлер және құқық қорғау органдарының қызметкерлері қатысты.

Тренингті кәсіби медиатор Мақат Жұмашұлы Шапиев жүргізіп, этносаралық саладағы жанжалдарды тиімді шешудің негізгі аспектілерін жан-жақты түсіндіріп, медиация саласындағы тәжірибесімен және білімімен бөлісті. Мақат Жұмашұлы медиация қағидаттарына, оның өзара түсіністікке қол жеткізуге және шиеленіс жағдайларының бастапқы кезеңдерінде дамуын болдырмауға мүмкіндік беретін негізгі әдістері мен тәсілдеріне ерекше назар аударды.

Бұл шараның негізгі мақсаты – қақтығыстарды болдырмау және шешу механизмдерін жетілдіріп, медиация институтын нығайту арқылы этносаралық келісімді сақтау болып табылады. Бүгінгі таңда қоғам көпұлтты бола түсуде, осыған байланысты медиацияның рөлі маңызды болып отыр: ол тек қақтығыстарды шешіп қана қоймай, оларды ерте кезеңде алдын алуға мүмкіндік береді.

Семинар барысында жергілікті деңгейде медиация институтын ұйымдастыру және дамытуға қатысты маңызды мәселелер талқыланды. Қатысушылар этностық топтар арасындағы қақтығыстарды қалай шешуге болатынын, оларды ушықтырмау үшін қандай шаралар қолдану керектігін қарастырды. Ерекше назар қақтығыстарды шешудің тиімді әдістерін қолдану арқылы қоғамдағы ықтимал шиеленіс ошақтарын анықтауға аударылды.

Талқылаудың маңызды бір аспектісі этномедиация – қатысушылардың этномәдени ерекшеліктерін ескере отырып қақтығыстарды шешуге бағытталған медиацияның арнайы түрі болды. Бұл медиация бағыты тек кәсіби дағдыларды ғана емес, сондай-ақ әртүрлі этникалық топтардың мәдени және ұлттық ерекшеліктерін терең түсінуді талап етеді. Құқық қорғау органдарының қызметкерлері, заңгерлер және әлеуметтік педагогтар қақтығыстарды реттеу бойынша өз тәжірибелерімен бөлісті.

Қақтығыстарды шешуде психологтар мен әлеуметтік педагогтардың рөлі маңызды. Олар қақтығысқа қатысушылардың эмоционалдық жағдайын бағалай отырып, олардың психологиялық көңіл-күйімен жұмыс істейді. Семинар барысында психологтарға қақтығыс жағдайларын эмоционалдық және мәдени аспектілерін жақсы түсінуге мүмкіндік беретін әдістер талқыланды. Аягөз ауданының әлеуметтік педагогтары мен психологтары соңғы жылдары жастар арасында этносаралық қақтығыстардың көбейіп жатқанын атап өтті. Сондықтан жас ұрпақпен жұмыс жасау және оларды конструктивті диалогқа тарту — басты міндеттердің бірі.

Мұндай іс-шараларға мемлекеттік қызметкерлер мен заңгерлердің қатысуы медиацияның құқықтық негіздерін нығайтуға мүмкіндік береді. Заңнамалық қолдау медиация институтының табысты қызметінің ажырамас бөлігі болып табылады. Семинар барысында этносаралық салада туындайтын даулы мәселелерді шешуге арналған құқықтық бастамалардың мысалдары қарастырылды. Заңгерлер этносаралық салада туындайтын даулы мәселелерді шешудегі тәжірибелерімен және медиация процесіне қатысушыларды қолдау және қорғау әдістерімен бөлісті.

Ұйымдастырушылар мен қатысушылар бұл семинардың Аягөз ауданында медиация институтын нығайтудағы маңызды қадам болғанын атап өтті. Қатысушылар мамандардың біліктілігін арттыру, сондай-ақ қоғамдағы қақтығыстарды болдырмау үшін жағдай жасау мақсатында одан әрі ынтымақтастық пен тәжірибе алмасудың қажеттілігін атап өтті.

Алдағы уақытта «Сана» жастар қоғамдық бірлестігі осындай іс-шараларды жалғастырып, этномедиация жүйесін құруға көбірек мамандарды тартуды жоспарлап отыр. Бұл күш-жігер Абай облысында тұратын халықтар арасындағы бейбітшілік пен келісімді нығайтуға, қоғамдағы тұрақтылықты ұзақ мерзімге қамтамасыз етуге бағытталған.

Абай облысының ішкі саясат басқармасы ұйымдастырған ақпараттық-түсіндіру және медиация жұмыстары жобасы аймақ үшін ерекше маңызға ие. Бұл жоба — этносаралық мәселелер бойынша сауатты жұмыс істеудің қоғамдағы үйлесімділікті нығайтудың негізі бола алатынының мысалы.

---

---

---

---